Mieliepitte en Geldstukke
Deur "Rysie"

Mieliepitte groei aan 'n mieliestronk, die stronk aan die plant en die plant in die grond ( as daar groen gras daarom groei moet jy dit uitskoffel). Die mielieplant is nie veel werd nie behalwe vir die feit dat dit die mieliepitte met die grond verbind. Die mieliestronk is ook nie baie werd nie behalwe in die Vrystaat. Die Vrystaters gebruik die stronke om braaivleisvure te maak en ook hulle voete daarmee te skrop. Hulle skree dan ook vir die Vrystaat in die Curriebeker.

Die mieliepitte se prys word op Safex bepaal. Safex is die South African Futures Exchange, wat deel is van die Johannesburgse Effektebeurs. Daar word ongeveer 200 Miljoen rand se mielies daagliks op die beurs verhandel. Die verhandelinge vind elektronies plaas tussen makelaars. Die sluitingsprys word dan vir Riaan Cruywagen gegee om op die sewe uur nuus al die mielieboere daarmee af te pis en so ook die res van ons.

Die markprys word bepaal deur die vraag en aanbod van mielies. Aan die aanbod kant van die wisselwerking is die ouens met khaki hemde en bakkies onder hulle arms - die mielieboere. Die vraagkant van die vergelyking word verteenwoordig deur meulenaars en veeboere (nog ouens met khaki hemde en bakkies onder hulle arms). Die meulenaars maal die mielies en voer dit dan vir mense of diere.

Ongeveer twee derdes van Suid Afrika se diëet bestaan uit mielies. Ons mense eet hoofsaaklik witmielies in die vorm van mieliepap. Geelmielies word gebruik om diere te voer, of die van ons wat onder andere "Nik Naks" en "Corn Flakes" verkies. Die diere eet verkieslik geelmielies want dit het meer voedingsware en dit maak die eiergeel geeler as gewoonlik.

Etanol, wat 'n brandstofmiddel is en met petrol gemeng word, kan ook van mielies vervaardig word. Amerika gebruik huidiglik meer as 15 % van hulle mielieproduksie vir die vervaardiging van Etanol. Suid Afrika kan in die toekoms poog om dieselfde te doen.

Suid Afrika is een van die grootste mielieprodusente in die wêreld en produseer ongeveer 9 miljoen ton mielies per jaar. Dit steek egter sleg af teen die VSA, wat 300 miljoen ton produseer, wat amper die helfte van die wereld se mielies is. Die ander groot kanon is China, wat meer as 120 miljoen ton produseer. Die beskikbaarheid van mielies in ander lande het 'n direkte invloed op die plaaslike mielieprys. Die prys van mielies in Amerika (verhandel op die Chicago board of trade) bepaal die invoerpariteit, m.a.w die koste om mielies in te voer. Die prys wat ons buurlande vir mielies betaal, bepaal die uitvoerpariteit.

Ons mielies verhandel dan bo die uitvoerpariteit (koste om mielies uit te voer) en onder die invoerpariteit (koste om mielies in te voer). Weerpatrone wêreldwyd, maar veral in Suider Afrika het 'n direkte invloed op die mielieprys, want hoe gunstiger die groeitoestande hoe groter aanbod sal ontstaan. As dit lyk of dit wil reën, dan val die mielieprys. As dit lyk of dit nie wil reën nie, dan styg die mielieprys. As 'n hoender in Argentinië bird flu kry of 'n bees in Brittanje malkoeisiekte kry, dan val die mielieprys.

Die mielies verhandel in 100 ton kontrakte op die beurs . Die kontrakte is meestal vooruit kontrakte (Futures Contract), wat beteken dat jy die prys van die mielies bepaal maar eers op 'n vasgestelde tyd in die toekoms die mielies lewer en die betaling ontvang. Die kontrakte of opsies op die kontrakte kan dan enige tyd voor die leweringstyd verkoop word. Meer as 90% van alle kontrakte word verkoop. Die prys kan met maksimum R45 per dag styg of daal. Minimum bet R 10 000.