Die tafghaai met die mullet het twee keer by sy bakkie se ruit uitgekots toe hy oor die karradio hoor dat sy vriend in 'n skietongeluk oorlede is: 'n groot vinnige spat soos 'n omgeskopte mop-emmer en 'n hartroerende, keelskeurende, slymerige tweede. "Vyf koeëlwonde" het die gesiglose stem gesê.
"Hoe futiel is die lewe nie" het die tafghaai gewonder, want net 'n naweek gelede het hy en die oorledene gaan vlieg en die oorledene, wat nie van vlieg hou nie, het 52 keer gekots. Die tafghaai het dit ontsettend teleurstellend gevind dat iemand wat 52 keer kan kots, en daarvan kan telling hou, ook kan sterf.
Die tafghaai het 'n hartseer gesig getrek, 'n ghwai gelaait en die bakkie se neus die langpad ingesteek.

'n BMW sit nou al 'n geruime tyd op die bakkie se gat. Die tafghaai keur sulke gedrag af. Hy spring op die rem. Die BMW reageer met 'n danspassie, wikkel diekant, dan daaikant toe en poes in die bakkie se boude in. Die drywer vat 'n hap glas en verloor 'n oog as hy deur die windskerm vlieg en agter op die bakkie te lande kom. Die tafghaai pop die bakkie in tweede, los 'n opgevrommelde BMW agter, steek sy hand deur die ruit en voel rond op die bak, kry die bebloede drywer beet aan sy hare, pop die bakkie in derde, ruk die drywer van die bak af, en hou hom vas terwyl sy steelcapped Bronx sparks op die teerpad trek. Dis 'n gesig wat die tafghaai nie beter wil leer ken nie en hy los hom laat hy 36 rolle maak om drie minute later deur 'n aan-die-slaap trokdrywer doodgery te word.
Die tafghaai sê "fokkit!" as hy wonder hoe sy bakkie se boude lyk. Agterop die bakkie is 'n pas gefrommelde bumpersticker so groot soos die laaiflap wat die tafghaai 'n week gelede aangebring het om 16 koeëlgate toe te maak. Die bumpersticker sê: "If you can read this you're not blind."
Dit was juis hierdie bumpersticker wat die BMW drywer so die josie ingemaak het. Hy wou die tafghaai donder en het toe op sy gat geklim. Die BMW drywer se vrou het vroeër vanjaar verdrink. Sy was blind en het nie die swembad gesien nie.
Maar dit het die BMW drywer geen rede gegee om die tafghaai se dag verder om te krap nie, want sy vrou het nie verdrink omdat sy blind was nie, maar omdat sy nie kon swem nie.
Die tafghaai is oppad see toe.

Ruan Kemp